Intezaar

Raat ka jaane kaun pehar hai, subh mein kitni der abhi hai
Ek kali chadar mein lipti, suraj ki tasweer abhi hai

Haath ke bandhan khol diye hain, shayad ab ke chhoot hi jaoo.n
Qaid mein barso.n beet gaye hain, pairo.n mein zanjeer abhi hai

Door kahi.n koyal hai kooki, aur chali hai purwaiyya bhi
Lekin khet keha.n se seechoo.n, dehqa.n ki tadbeer abhi hai

Kitne mausam guzar gaye hain, kitni sadiyaa.n beet gayi.n hain
Ashab-e-kehef bhi soye huye hain, baitha wahee.n qitmeer abhi hai

Amn ki khabrei.n garm hain yaroo.n, sachchayi ki bhi baatei.n hain
Masoomo.n ka khoon zamee.n par, haatho.n mein shamsheer abhi hai

Ishq ki aag ho phir se raushan, dil ho.n munawwar noor-e-khuda se
Maslak ke jhagro.n mein uljhi waaiz ki taqreer abhi hai

Door ufaq ke paar kahei.n ummido.n ke raushan lashkar hain

Par azmi dhundhli dhundhli tere khawabo.n ki taabeer abhi hai