Benaam shaheedoN ke naam

For Niyamat Ansari and many like him who are killed everyday across the world for daring to speak out the truth.


Ye Jang ruki thi kab

Ye jang to jaari hai

Ye jang hamaari hai



Ye jang hamee’at ki

Insaan ki qeemat ki

Har ahl-e-hawas se hai

Har ahl-e-hakam se hai

Har zuml-o-sitam se hai

Har jhoot se, nafrat se

Auhaam se dahshat se

Har rang ki zulmat se



Ye jang to jaari hai

Ye jang hamaari hai



Is jang se waabista

Har zinda sipahi ki

Shamsheer hai haq-goi

Aqdaar alam uska

Bebaak qalam uska

Bekhauf qadam uska

Har aan , har ek lamha

Aabad bayaabaN meiN

Barbaad khayaabaN meiN



Ye jang to jaari hai

Ye jang hamaari hai



Ye raah nahi aasaN

Har mod pe khatray haiN

Benaami ke teeshay haiN

Aur khoon ke qatray haiN

Bichday huay khwabooN ki

Posheeda kasak ismeiN

Sab kho kar paanay ki

Tabinda tadap ismeiN



Ye jang to jaari hai

Ye jang hamari hai



Woh din bhi aayega

Jab jang khatam hogi

Jab zulmat kam hogi

Benaam shaheedoN ki

Taareekh raqam hogi

Insaan se insaaN ki

Taqseem rukegi jab

Insaan pe insaan ki

Tahkeem rukegi jab



Ye jang to jaari hai

Ye jang hamari hai

Ye jang ruki thi kab

.

Ghazal- Shaam hai koi gham

Shaam hai, koi gham nahi hai kya
Dard-e-dil aaj kam nahi hai kya

Usnay sun kar bhi an-suni kar di
Meri baatoN meiN dam nahi hai kya

Dil hai zinda to hai museebat meiN
Hasrat-e-chashm-e-nam nahi hai kya

Girtay jatay haiN saaray ahl-e-hakam
Zor-e-taygh-e-sitam nahi hai kya

Tum hi ho markaz-e-jahaan-e-wajood
Tum ko aisa waham nahi hai kya

Bik gaye saray bahr-o-dasht-o-jabal
Ab bhi duniya khatam nahi hai kya

Daagh aao saja leiN maathay par
Ahl-e-dil ka alam nahi hai kya

kyooN ho khamosh bazm mein Tanzil
paas uskay qalam nahi hai kya

Glossary:
Shaam: Evening, gham: pain, dard-e-dil: suffering of the heart/longing
An-suni: ignored, dam: strength
Zinda: alive, museebat: trouble,
Hasrat: Yearning, chashm: eyes, nam: tearful/wet, hasrat-e-chashm-e-nam: yearning for pain
Ahl-e-hakam: Tyrants
Zor: strength, taygh- sword, sitam: atrocity , zor-e-taygh-e-sitam: military might
Markaz: centre, jahaan-e-wajood: the world of being, waham:delusion/fallacy
Bahr- Ocean, dasht: forest, jabal: mountain,khatam:end
Daagh: scar,maatha(y): forehead, ahl-e-dil: people of the heart (lovers) alam: flag
Khamosh: silent, bazm: assembly/gathering, qalam:pen

Phir nigaah ho roshan- Ghazal

Phir nigaah ho roshan, phir tera khyaal aaye
Hai giraaN ye tanhaayi, phir shab-e-wisaal aaye


Jaam-e-jam se mit jaaeiN talkhiyaaN zamaane ki
Jab jawaaN ho ra’anayi , jab tera Jamaal aaye


Is tarah to usnay hi saaray rabt today haiN
Aur kaisay baat uththay , aur kya sawaal aaye


Sab pata haiN hamko bhi, sabr-o-shukr ki baateiN
Phir bhi uskay jaanay ka kis qadar malaal aaye


Kuhr meiN chhipa jab se , khwab ka shahar saara
Gardish-e-lahoo jaamid, nafs meiN ubaal aaye


Ek sawaal hai maazi, ek sawaal mustaqbil
Jaanay koi aisay meiN , kaisay mast-haal aaye


Ja-ba-ja saraaboN ke aabju rawaaN Tanzil
Jaanay phir bhi tum kaisay jism-o-jaaN sanbhal aaye



Glossary:

Nigaah: vision, Roshan: illuminated, khyaal: thoughts, giraaN: difficult, shab: night, wisaal: union

tanhayii: loneliness, ra’anayi: Beauty, Jamaal: Beauty

Jaam-e-jam: Cup of Jamsheid filled with elixir of immortality , TalkhiyaaN: Bitterness

Rabt: relationship, sabr-o-shukr: perseverance and thanksgiving, malaal: grief

Kuhr: Fog, Khwab: dream, shahar: city, gardish-e-lahoo: blood circulation, jaamid: frozen

Nafs: temptations, ubaal: boiling, maazi: past, mustaqbil: future, mast-haal: happy with the present

Saraab: mirage, aabju: rivulet, rawaaN: flowing, jism-o-jaaN: body and soul

Raah-e-wafa meiN shayd madaraat

Raah-e-wafa meiN shayd madaraat ho na ho
Apni tarah hi unkay bhi jazbaat ho na ho

SholoN meiN ishq ke yuhiN khamosh mar mito
Kahnay ko umr bhar kahiN koi baat ho na ho

Kuch to hua usay ke mere khat haiN be-jawab
Naa’ma bari ke shahr meiN haalaat ho na ho

Sab jaam us kay naam isee sham pi gaye
Ham hoN, ye bazm ho ke ye raat ho na ho

Hoti hai ashk-e-khoon se sairab ye zameeN
Ab kya khabar ke phir wahi barsaat ho na ho

Guzray haiN roz-o-shab mere jis intezaar meiN
Dast-e-falak ke paas woh khairaat ho na ho

Tanzil unkay saaray sitam ab bhoool jaeeyay
Ba’ad-e-shab-wesaal mulaaqaat ho na ho

Shab-e-siyah meiN sitaray

Shab-e-siyah meiN sitaray talash karta hai
Woh shakhs jhootay saharay talash karta hai

ban gayaa khud woh raushni apni
Jo noor-e-haq kay shararay talash karta hai

Bahut azeez hai aazadi-e-samandar bhi
Ye dil magar phir kinaaray talash karta hai

bin kahay baat jis say pahunchay unhay
Woh kuch aisay ishaaray talaash karta hai

Aa kay ham dil jaloN ki basti meiN
Chara-gar dil kay maaray talash karta hai

Chashm-e-jaaN hi nahi rahi jismeiN
Be-wajah kyooN nazaaray talash karta hai

Ishq-e-dereena

Sheesha-e-dil meiN kisi ka aks madhdham ho gaya
Jaanay kaisay be-asar woh ishq-e-paiham ho gaya

Sozish-e-dil ki abhi tak yaad haiN teesaiN hameiN
Kuch hawaa aisi chali har zakhm marham ho gaya

Tha chaman bhi un dinoN furqat meiN apna ghamgusaar
Waqt jab guzra to bas marhoon-e-mausam ho gaya

Shaam se har daagh-e-dil ashk-e-khooN rota raha
Raat jab gahri huyi har daagh shabnam ho gaya

Kuch to aisi baat thi uski nigah-e-naaz meiN
Jo bhi uskay paas pahuncha pal meiN bedam ho gaya

Uski qurbat meiN jisay kuch aur dikhta hi na tha
Uskay jaatay hi yehaN har shakhs mahram ho gaya

Woh raha har anjuman meiN ham se yuNhi be-nayaaz
Ham se hi ahd-e-wafa ka baab qayam ho gaya

Kya bataeiN dil ko aisi ulfatoN meiN kya mila
Reit ka chota sa zarra maah-o-anjum ho gaya

Chaumukhi Tanhaayi

Ek baat samajh meiN aayi hai
Ye chaumukhi tanhaayi hai
Is samt chalooN, us samt chalooN
Jis samt chalooN gahraayii hai

Har shahr hai veeraN veeraN sa
Har shakhs hai hairaN hairaN sa
Har sham hai dhnudli dhundli si
Har shama hai dheemi dheemi si

Is shahr meiN ek saudayii hai
Ye shama jis nay jalayii hai
Ek baat samajh meiN aayi hai
Ye chaumukhi tanhaayi hai

Gul, bootay, saaghar, la’al-o-guhar
Rut, mausam,shayr, shams-o-qamar
But, sang, khuda, shamsheer-r-separ
Haq, raast, saza, zindan-o-zehar

Har rang meiN ek raa’nayii hai
Har raah meiN ek ruswaayi hai
Ek baat samajh meiN aayi hai
Ye chaumukhi tanhaayi hai

Ye rishtay , dost, shanasaayi
Sab apni dhun meiN phirtay haiN
Ye ishq, muhabbat, naaz-o-ada
Sab yuNhi man meiN bastay haiN

Sab naam-o-nasab parchaayi hai
Sab mehr-o-wafaa harjaayi hai
Ek baat samajh meiN aayi hai
Ye chaumukhi tanhaayi hai

Kuch dasht-o-jabal sar karnay haiN
Ek saadha sehraa baqi hai
Hai raah meiN chhotaa daldal bhi
Ek aag ka darya baaqi hai

Is paar na ek shaidaayi hai
Us paar na ek shaidaayi hai
Ek baat samajh meiN aayi hai
Ye chaumukhi tanhaayi hai

Azaadi – 63 saal baad

Kaisi talab hai iski, tishna-laboN se poocho
Ham be-khabar haiN jinko bin-maaNgay mil gayi hai

Mazloom thay kabhi jo zaalim banay hua haiN
Insaaf ki zubaaN phir kaatoN se sil gayi ai

KhwaboN pe khanjaroN se phir vaar hai kisi ke
Zanjeer se zameeN ki buniyaad hil gayi hai

Hai soch par bhi jinki sipah-e-syah muqarrar
Kaisay ye sang-bari ghir unkay dil gayi hai

Phir khoon-e-naujawaaN se hai surkh bagh-e-jannat
Phir tabish-e-hina se har jheel khil gayi hai


Tanzil


Glossary:

Talab: Craving
Tishna-laboN: Thirsty
Be-khabar: Unaware
Mazloom: Victim
Zaalim: Oppressor
Insaaf: Justice
KhwaboN: Dreams
KhanjaroN: Daggers
Vaar: Attack
Zanjeer: Chain
Buniyaad: Foundation
Sipah-e-syah: Black Cammandos
Sang-bari: stone pelting
Khoon-e-naujawaaN: Blood of the young
Surkh: Red
Bagh-e-jannat: Garden of paradise
Tabish-e-hina: The shine of Hina ( Mehndi)

Phir wahi mausam

Phir dabay paaoN wahi mausam hua hai jalwaa-gar
Aur fizaa meiN khauff ki parchhaiyaaN aayiiN nazar
Ab ke dakkan se hawa nafrat ki uththi hai rafeeq
Kaun jaanay kis taraf hai in hawaaoN ka safar

Phir wahi chingaariyaaN uth-ti hui taqreer se
Aur diloN par zehr-paashi nashtar-e-tahreer se
Kuch naye chehray sayaasat ki wahi ochhi besaat
Khel dahshat ka puraana mulk ki taqdeer se

En ki saazish se kaheeN phir bat na jaye ye samaaj
Aur sankat meiN ghirey phir se ye jamhoori mezaaj
Khoon maasoomoN ka dharti par bahaaya jaye phir
Aur bithayaa jaye dil par an-kahay ek bhay ka raaj

Is se pehle ke ta-assub ke ye andhay peshwa
Tang kar deiN ya zameeN ye aasmaaN aur ye hawaa
Chheen le aazadiyaaN afkaar ki , iqraar ki, inkaar ki
Chheen leiN lauh-o-qalam , meri nawa teri nawa

Aao badhkar rok deiN inkay ye ithlaatay qadam
Aur milkar tod deiN nafrat ki taaqat ka bhadam
Ek dafaa phir is zameeN se aye mere ahl-e-watan
Naghma-e-wahdat sunaaeiN is jehaaN ko milkay ham

Tarz-e-Sukhan

Shaayri kaisi ho meri, ho mera tarz-e-sukhan kya
Bahr ho azaad ya phir qaafia ho ham-wazan kya

Soz-o-saaze-e-zindagi ho maqsad-e-ashaar mera
Fikr-e-aalamgeer ho ya kaawish-e-deen-o-watan kya

Bar sar-e-aflak hoN mere takhayyul ki udaanei.n
Sirr-e-takhleeq-e-jahaaN ya raaz-e-qais-o-kohkun kya

Maddiyat ki hawa se maiN bacha looN apna daaman
Garmi-e-shauq-e-junooN ya rahbaana pairhan kya

MausmoN ke rang saare apni nazmoN meiN utaarooN
Shokhi-e-dast-hena ya sabza-e-sarr-o-saman kya

Baazoo-e-qatil jhatak dooN reekhttey ke zor se maiN
Shayraana adl ho ya inqalab-e-jaan-o-tan kya

Phir se raushan ho diloN meiN deen ki shama-e-farozaaN
Ijtehad-e-asr-e-nau ya taqleed-e-andaz-e-kuhan kya

Ho mere ashaar se ahl-e-wafa ki tarjumanee
Ilm ki mauj-e-rawaa.N ya ishq ka deewanapan kya

Hastiy-e-shayar nehaaN hai sher mein alfaaz ban kar
Intashaar-e-boo-e-gul ya nauha-e-murgh-e-chaman kya

AarzooeiN

AarzooeiN

Najanay kab se ham yuNhi sar-e-bazaar baithay haiN
Hai dil meiN aarzoo jaaN bechne ki jaaN lutanay ki

Nawa-e-shauq se, khoon-e-jigar se, bikhray khwaboN se
Tilism-e-aab-o-gil say door ek duniya basaanay ki

Purani kashtiyaN lay kar, shikastah baadbaaN chun kar
hawaaoN ke nayay rukh par naya bedaa laganay ki

shafaq se rang laya kar , shaam sa khamoshiyaaN lay kar
jigar kay saaray daaghoN ko gul-e-laala bananay ki

har ek taar-e-nafas meiN shola-o-faulaad pighla kar
tan-e-aasaaN ko shamsheer-e- jahaN paima bananay ki

Rumooz-e-ishq kay aab-e-rawaaN meiN ghota zan ho kar
zameeN ki khaak ko auj-e-surayya tak udanay ki

Naya Bazaar

Beshak nigah-e-Qais ko deedar chahiyay
Aur husn-e-Yusufi ko khareedar chahiyay

Bazaar-e-nau-bahaar meiN bikta hai jo bhi bech
Bas bechnay ko taaqat-e-guftaar chahiyay

Ilm-o-hunar khareed kahiN, kar khaiN farokht
Dil beech ke nafay ka talabgaar chahiyay

Ab fikr-e-naqd chhor or lay lay sab udhar
Zan ho, zameen ho kay zar-o-tar chahiyay

Mil jayegaa tujhay bhi muNh maaNga daam yaan
Saudagiri meiN aadat-e-takraar chahiyay

Deen-o-khuda bhi arzaaN hai har taraf yahaN
But chahiyay, kaleesa ke meenar chahiyay

Thi zarq-o-barq ki tujhay is qadar hawas
To kyooN kaha tha chhota sa sansaar chahiyay

Qayal hai mere fan ka naqqad-e-nukta-cheeN
Fankar ko bhi aakhir ek bazaar chahiyay

Ab qeematoN ki fikr na kar jaaN apni bech day
Khoy huaa tujhay agar pindaar chahiyay

Bikta hai dekhiyay kehaaN Tanzil-e-be-ma’aal
Suntay haiN usko seerat-o-kirdaar chahiyay

Nauha-e-gham

Aj shab kuch is tarah har gosha-e-dil hai fegaar
Jaisay har tare-nafas meiN sabt haiN taar-e-fina

Kaisi nahamwaar haiN is shar ki raaheiN na pooch
Kis qadar dushwar hai ek ek qadam rakhan yehaN

Mit-tay jatay haiN nuqoosh-e-paa zameen-e-khyaal se
Reit say athkheliyaaN karti hai bedhangi hawaa

Jisko dekho pa-ba-zanjeer-e-giraft-e-maslihat
Janay kaisay shar meiN phaili ghulami ki waba

kyooN hai arzaaN is qadar masoom insanoN ka khooN
hai ye kamzori ki ya masoomiyat ki hai saza

is tarah phaili hai ab kay bazm meiN begaangi
yaad hai kisko yehaaN ab wada-e-mehr-o-wafa

dil ko rah rah kar bulata hai tilasmaati sarab
dasht ki raanaiyaaN har lamha seti hain sada

koi samjhaya ke kya hai raaz-e-hangaame-hayat
kyoon nahi kuch chara-e-gham be neyaazi ke siwa

Kaisay hui tabinda

Kaisay hui tabinda andheroN se saji raat
Tha zikr charaghoN ka, charaghoN se saji raat

Rakhshanda sitaroN pe raha abr ka saaya
Bhatkay huay rahi ki nigahoN se saji raat

Ek umr se mitna tha patengoN ka muqaddar
Mit-tay huay parwaanay ki saansoN se saji raat

Jis shokh ki zulfoN meiN chhipa sham ka sooraj
Us soorat-e-jaanaN ke khyaloN se saji raat

Jal kar hui khakastar har shakh-e-gulistaN
Jaltay huay khwaboN ke shararoN se saji raat

Din gharat-e-duniya, hai giraN rahat-e-giryaa
Tanzil-e-jigar-soz ke ashkoN se saji raat

Kisi ko kya khabar

Kisi ko kya khabar maiN kahaN kahaN se guzra hooN
Sulagtay shahr se jaltay makaN se guzra hooN

Dayar-e-shauq ki raaheiN nahiN hain kuch aasaaN
Na janay kitnay hi aatish-fashaaN se guzra huN

Woh tashnagi hai ke kisi cheez se nahi mit-ti
Mai-e-neshaat se aab-e-rawaaN se guzra huN

Ata hui aaba ko jis dar se deeda-ay-beena
Baghair dakhay ek umr usi asstaaN se guzra huN

Charagh jaltay rahey subh tak rang-e-inbesaat liyay
MaiN be-sabab shab-e- aah-o-fughaaN se guzran huN

Uthaye sar taktay rahay aarzoo meiN chhoonay ki
Gira jo sar par tab us aasmaaN se guzra huN

Bula rahay thhey har gaam par hazar daam-e-hayat
Chupaye lauh-o-qalam la-makaaaN se guzra huN

Phir dil-o-jaan hazeeN

Phir dil-o-jaan hazeeN, sham hai tanhaayi hai
Kisnay seenay meiN mere aag ye sulgayi hai

Rakh gaya kaun ye naghmay meri dahleez taley
Shab-e-dayjor meiN kisko meri yaad aayi hai

Woh jo milta hi nahiN uska gila kissay kareiN
Tum milay ho jo aaNkh ye bhar aayi hai

Usko dhooNdha hai bhadi bheed meiN aksar maiNay
Uske hissay meiN bhi shayd yahi tanhaayi hai

Sham hai, darya-e-shab ka kinara hai abhi
Har qadam dekh ke aagay badi gahraayi hai

Tere khaaboN ka nasheman nahiN ye band makaaN
Bas yehi baat dil-e-bezaar ko samjhaayi hai

Ghar ke benoor dareechoN se utha do parday
Kuch naye rang liye baad-e-saba aayi hai

Arz ye hai ke mile usko bhi dasht-e-JunooN
Log kahtay haiN ke Tanzil bhi saudaayi hai

Hai Baat kya kay

Hai Baat kya kay hawa-e-watan saazgaar nahi
Tan-aasaaN log bahut, dil-e-daaghdaar nahi

Jo dast-e-qatil o ahl-e-hawas ko rok sakei.N
Tamam shahr meiN aisay badah khaar nahi

Baghawato.n ki sadaaeiN haiN gonjte hai.N pahaad
Jo sang-o-khisht muqayyad tHe, be-ekhteyaar nahi

Na koi waada-e-farda, na ishq-e-posheeda
Teri wafaao.n pe ab hamko aitabaar nahi

Ye joo-e-khoo.n, bujha aftaab, ye haqeeqat hain
Mere takhayyul ka koi shaahkaar nahi

Jewaa.n lahoo se hai qaym rangeeni-e-hena-e-chaman
Hai kaun ahl-e-wafa jo sang-saar nahi

Un hi ke dam se hai qaym weqar-e-maikhana
Jo rasm-e-maikashi se kabhi sharmsaar nahi

Hai ismeiN gardish-e-ayyam par hayaat keha.n
Har ek lemha ke jab tera entezaar nahi

Gham-e-hayat ne daali hai.n bandishei.n warna
HameiN to yuN nahi ke kisi se pyaar nahi

Zubaan-e-taan mei.n larzish, dil-e-syaah mei.n yaad
Namaz-e-nyaaz hai yaaro, ye ishtehaar nahi

Ho shama kaisay farozaa.n, hangama ho bapa kaisay
Woh anjuman ke jeha.N zikr-e-yaar nahi

Glossary

Hawa-e-watan: air of my city, saazgaar: suitable, tan aasaa.n – comfort seeking, dil-e-daaghdaar: compassionate heart

Daste-qatil: murderer’s hands, ahl-e-hawas: evil forces, badah khaar: drunkard

Baghaawat: rebellion, sang-o-khisht: stones and pebbles, mugayyad: imprisoned, be-ekteyar: with no authority

Waada-e-farda: promise of tomorrow, ishq-e-posheeda: secret love, aitbaar: belief

Joo-e-khoo.n: river of blood, aaftab: sun, takhayyul: imagination, shaahkaar: materpiece

Jewaa.n lahoo: yong blood, rangeeni: colour, ahl-e-wafa: men of honour, sangassar: stoned

Weqar: pride, maikhana: bar, rasm: tradition, bandagi: submission to God, Sharmsaar: ashamed

Rawaa.n: moving, gardish-e-ayyam: alternation of days, hayat: life)

Gham-e-hayaat: pains of life, bandishei.n: obstacles

Zubaan-e-taan: twisted tongue, larzish: trembling, dil-e-syaah: blackened heart
Neyaaz: humility , ishtehaar: advertisement

Shama: candle, farozaa.n: lit, bapa: happen, anjuman: celebration/party, zikr-e-yaar: talk of the beloved

Ajeeb shor tha

Ajeeb shor tha jisnay mujhay jagaya tha
Andhera khwab tha , chehra nazar na aaya tha

Palat raha tha jo kal kuch puranay waraq
Kisi ka naam kitaboN mein baar baar aaya tha

Haseen waqt tha jab deyar-e-ghair meiN bhi
Tera khayal kabhi taaroN ki sham laaya tha

Hain is qadar pur-painch tere shahr ki raaheiN
Bhatak gaya woh jisnay raasta dikhaya tha

Usi ke dam se hui haaN aam meri ruswayyi
Woh shakhs jisko kabhi raazdaaN banaya tha

Woh log soye haiN bewaqt khawab-e-masti meiN
Payaam jinko kabhi jaagnay ka aaya tha

Tamaam zulm ki buniyaad chand ahl-e-hakam
Na janay kyoon inheiN hamnay khuda banaya tha

Utho jo saath chalo, Tanzil bhi chalay shayd
Bhataktay raastoN nay usko bhi kal bulaaya tha

Shaakh khyaloN meiN

Shaakh khyaloN meiN shajar ho jayegi
Raat KhwaboN mein sehar ho jayegi

Syaah sheeshoN meiN chhipi hai chashm-e-jaaN
Umr chhaoN meiN basar ho jayegi

Zindagi saloN meiN guzri be-nishaN
Maut lamhoN mein khabar ho jayegi

Shokh nazroN meiN bujhe kuch jalte teer
Aag seenoN meiN zahar ho jayegi

Dil sitaroN meiN hua be-abroo
Khak-saaroN meiN qadar ho jayegi

Ashk aankhoN meiN nehaN aur lab khamosh
Aah lafzoN meiN sharar ho jayegi




Shaakh - Branch
Shajar – Tree
Sehar - Dawn
Chashm-e-Jaan Eyes of the soul/beloved
Be-nishaaN Unremarkable
Shokh Naughty
NazroN Eyes
Be-abroo Not respected/ Lowly
Khaak-saar Modest/Humble
Qadar Respect/Value
Ashk Tears
Lab Lips
Aah Grief
Sharar Spark

Zakhm bhartay bhi nahiN

Zakhm bhartay bhi nahiN nayay zakhm laga deta hai
Jaanay kyooN woh dabay sholoN ko hawaa deta hai

Mera qatil hi yehaaN mulzim bhi hai munsif bhi hai
Zulm badhta hai to bas adl ki meezan jhuka deta jai

Kitna ghamkhwar hai qaid mera, hai kitna ghani
Chheen kar meri zameeN, mujhko amaaN deta hai

Naam mera sar-e-mahfil jab se liya hai usnay
Sang har shakhs yuNhi mujh pe utha deta hai

Jab se waaiz ne sanbhaali hai hukoomat ki kamaaN
Roz ek hukm nayaa ham ko suna deta hai

Woh haseeN shahr jo tahzeeb ka maskan tha kabhi
Chashm-e-pur-khooN se ab ashk baha deta hai

Bas ye ek paikar-e-khaki, zaalim hai kabhi mazloom kabhi
Waqt jaanay kisi kab kaisa banaa deta hai

Hai azal se yehi dastoor ke baaghee ko jehaa.n
Takhta-e-daar kabhi to kabhi shaahi quba deta hai

Glossary
Zakhm: wounds, sholo.n: flames

Qatil: murderer, mulzim: accused, munsif: judge, adl ki meezaan: balance of justice

Ghamkhwaar: compassionate, qaid: leader, ghani: self sufficient, zamee.n: land, amaa.n: shleter

Sar-e-maqtal: in the abattoir, sang: stones, shakhs: person

Waaiz: preacher, hukoomat: government, nezaam: administration, hukm: decree

Hasee.n shahr: beautiful city, tahzeeb ka maskan: abode of culture, chashm-e-pur-khoo.n: blood filled eyes, ashk: tears

Paikar-e-khaki: earthling, zaalim: cruel, mazloom: victim

Azal: beginning of Time, dastoor: norm, baghee: rebel, jehaa.n: world, takhta-e-daar; gallows, shahi quba: royal robe